سەرەدانا شاندەکێ هێرباریۆما نیشتمانی یا عیراقێ (BAG) بۆ کۆلیژا زانستێن ئەندازیاریا چاندنێ ل زانکۆیا دهۆک

ل ڕێکەفتی ٢٧/٠٧/٢٠٢٦، شاندەکێ فەرمی ژ هێرباریۆما نیشتمانی یا عیراقێ (BAG)، کو پێکهاتبوو ژ (د. ڕوسول سەعد حوسێن، د. عەلی هلۆب، خ. ڕەسول ئەحمەد مەحمود، م. حاتم محەمەد فەییاز، و م. لەتیف حەمزە ئیبراهیم)، سەرەدانا کۆلیژا زانستێن ئەندازیاریا چاندنێ ل زانکۆیا دهۆک کر.

شاند ژ لایێ ڕاگرێ کۆلیژێ د. شوکری حاجی ساڵح ڤە هاتە پێشوازیکردن. د دانیشتنەکێ دا، بەحس ل کار و چالاکیێن هێرباریۆما نیشتمانی د پشتەڤانیکردنا ڤەکۆلەرێن عیراقێ دا هاتە کرن، هەروەسا ڕۆلێ بەرچاڤ یێ کۆلیژێ د دەستنیشانکرن و پاراستنا ژینگەها سروشتی و رووەکێن دەڤەرا کوردستانێ هاتە نرخاندن.

د درێژاهیا سەرەدانێ دا، شاندی چەندین بەش و یەکەیێن زانستی بەسەرکرن:

• پشکا دارستانێ: شاند ئاشنای کادرێن پشکێ و پسپۆریێن زانستێن سروشتی بوون، وەک: زانستێ رووەکی، پۆلێنکرنا رووەکان، بڕێڤەبرنا ژیانا کێوی و لەوەڕگەهان، ب تایبەتی رووەکێن کێوی و دەڤەرێ.
• هێرباریۆما کۆلیژێ (DPUH): شاندی سەرەدانا هێرباریۆما زانکۆیێ ل پارێزگەها دهۆکێ کر و چاڤدێریا پێشڤەچوونا کاران کر. هەروەسا تێبینی و پێشنیارێن گرنگ ژ لایێ شاندی ڤە بۆ پێشڤەبرنا کارێ هێرباریۆمێ هاتنە پێشکێشکرن و بەحس ل بەرفرەهکرنا هەماهەنگییا زانستی هاتە کرن.
• باخچەیێ ڕووەکی ل زانکۆیا دهۆک: شاند ژ لایێ (د. حەسەن نەجمان، م. هونەر سەفەر، وم. ئەحمەد محەمەد حەسەن) ڤە هاتە پێشوازیکردن. تیشک خرایە سەر گرنگیا باخچەی د پاراستنا کەلەپوورێ ڕووەکی یێ دەڤەرێ و پێشکێشکرنا زانیاریان بۆ قوتابیان و جڤاکێ خۆجهی. ل داویێ، جەخت ل سەر ڤەگوهاستنا ئەزموونا باخچەیێ رووەکی یێ زانکۆیا دهۆک بۆ زانکۆیێن دی یێن عیراقێ هاتە کرن.

گەشتا مەیدانی بۆ چیایێ گارەی:
ل ڕۆژا پاشتر، ب هەڤالینیا مامۆستایێن پشکا دارستانێ د. جوتیار جاسم محەمەدو م. ئیبراهیم زیاد یوسف، شاندی سەرەدانا چەندین دەڤەرێن زنجیرە چیایێ گارەی کر ب مەرەما کۆمکرنا نموونەیێن رووەکێن دەڤەرێ، داکو ب شێوەیەکێ دروست بهێنە ئامادەکرن و ب بەردەوامی د ناڤ هێرباریۆما نیشتمانی یا عیراقێ دا بهێنە پاراستن.

نڤیسینگەها خزمەتێن پێزانینان ل کۆلیژا زانستێن ئەندازیاریا چاندنێ (CAES)، 10 ێ تشرینا ئێکێ 2026

ئامادەکرنا راپۆرتێ: سیپل محمد طاهر یوسف, بلند جلال ح. همبی.