ل ڕێکەفتی ٢٠ی چریا ئێکێ ٢٠٢٦، «پرۆژێ هەمەجۆریا زیندەیی یا کوردستانێ» ب فەرمی و ل ژێر چاڤدێرییا ڕێزدار مەسرور بارزانی، سەرۆکێ حکومەتا هەرێما کوردستانێ، و ڕێزدار ئارین مەسرور بارزانی، سەرۆکێ دەزگەهێ کوردستان (Kurdistan Foundation) ، ب ئامادەبوونا هژمارەکا بەرپرسێن حکومی و نوونەرێن زانکۆ و ناڤەندێن ئەکادیمی هاتە ڕاگەهاندن.

ئارمانجا سەرەکی یا ڤێ دەستپێشخەرییێ بریتییە ژ دۆکیۆمێنتکرن و پاراستنا سامانێ سروشتی یێ دەولەمەندێ کوردستانێ، ژ وان رووەک و گیانەوەرێن ناڤخۆیی، دەگمەن، نوی-تۆمارکری، تایبەت ب دەڤەرێ (endemic)، و ئەوێن بەر ب مەترسیا نەمانێ ڤە دچن. د ڤی ڕێورەسمی دا، پەرتووکا زانستی یا تایبەت ل ژێر ناڤێ «شیردەرێن هەرێما کوردستانی - ئیراق» (Mammals of the Kurdistan Region of Iraq) دگەل مالپەرێ فەرمی یێ پرۆژەی (www.biodiversity.krd) هاتنە پێشکێشکرن، دا کۆ ببیتە ژێدەرەکێ فەرمی و باوەرپێکری بۆ زانیاریێن هەمەجۆریا ژینگەیی ل هەرێمێ.

کۆلیژا زانستێن ئەندازیاریا چاندنێ ل زانکۆیا دهۆک پشکدارییەکا سەرەکی د ڤی پرۆژەی دا هەبوو ب ڕێکا دوو مامۆستایێن خۆ: د. أحمد محمد حسن مصطفى (وەک ئەندامێ دەستەیا پرۆژەی) و م. هـ. ئیبراهیم زیاد یوسف. پشکداریا وان پێکهاتبوو ژ دابینکرنا ب هەزاران وێنەیێن مەیدانی و پێزانینێن گرنگ یێن زانستی ل سەر جۆرێن رووەکێن کوردستانێ، کۆ بوویە پالپشتەکا مەزن بۆ ئەرشیفکرن و ناساندنا دەولەمەندیا رووەکی یا هەرێمێ.

ئەڤ بەشداریکردنە نیشانا پێگری و ڕۆلێ دیارێ کۆلیژێ و زانکۆیا دهۆکە د بهێزکرنا ڤەکۆلینێن زانستی، بلندکرنا هۆشیاریا ژینگەهی، و پاراستنا سامان و ژینگەها سروشتی یا نشتیمانی دا.

نڤیسینگەها خزمەتێن پێزانینان ل کۆلیژا زانستێن ئەندازیاریا چاندنێ (CAES)، 24 ێ چریا ئێکێ 2026

ئامادەکرنا راپۆرتێ: بلند جلال ح. همبی، سیپل محمد طاهر یوسف.