ل رێکەفتی ١٥-١-٢٠٢٦، بەشێ بیستانکاری ل کۆلیژا ئەندازیاریا زانستێن چاندنێ رابوو ب گێرانا سیمینارەکا تێروتەسەل ل ژێر ناڤێ "چاندنا هایدرۆپۆنیک" (چاندنا بێ ئاخ). ئەڤ روینشتنە ژلایێ (د. رۆفائيل شليمون توما) و (د. رەمەزان عومەر حوسێن) ڤە هاتە پێشکێشکرن ل هۆلا بەشێ رێنیشاندانا چاندنێ و گەشەپێدانا گوندەواری.

ئارمانجا سەرەکی ژ ڤێ سیمینارێ ئاشناکرنا ئامادەبوویان بوو ب زانستێ چاندنا رووەکان بێی بکارئینانا ئاخێ، ب رێیا بکارئینانا گیراوەیێن ئاڤێ یێن دەولەمەند ب توخمێن خۆراکی. پێشکێشکاران بەراوردکاریەکا هویر د ناڤبەرا چاندنا هایدرۆپۆنیک و چاندنا کەڤنار (تەقلیدی) دا ئەنجامدا، و تیشک خستە سەر مفایێن سەرەکی وەک کارایی یا زێدەتر د بەرهەمی دا، بەرهەمهێنان ل هەمی وەرزێن سالێ، و پاراستنا ئاڤێ ب ڕێژەیەکا بەرچاڤ کو دگەهیتە ٩٠٪ کێمتر ژ چاندنا د ئاخێ دا.

تەوەرێن گەنگەشێ چەندین رێکێن جودا بخۆڤەگرتن، ژ وان ژی تەکنیکا پەردەیا خۆراکی (NFT) و چاندنا د ئاڤا کویر دا (DWC)، هەروەسا گونجانا هندەک بەرهەمان وەک کاهیی و تووفرەنگی (فراولە) بۆ ڤی جۆرێ چاندنێ. سەرەرای ئاماژەدان ب ئاستەنگێن وەک تێچوویێ دامەزراندنێ و پێدڤیێن تەکنیکی، لێ سیمینارێ تەکەزی ل رۆلێ چاندنا بێ ئاخ کر وەک چارەسەریەکا گرنگ بۆ چاندنا باژێڕی و ئاسایشا خۆراکی د پاشەرۆژێ دا.