کۆلیژا زانستێن ئەندازیاریا چاندنێ ب سەرکەفتییانە دووەمین ورکشۆپێ نشتیمانی یێ ساڵانە ب هەلکەفتا ڕۆژا جیهانی یا خوارنێ ب دوماهیک ئینا

ل ڕۆژا پێنجشەمبی، ڕێکەفتی ١٥ی چریا ئێکێ ٢٠٢٦، پشکا زانست و تەکنەلۆژیایا خوارنێ ل کۆلیژا زانستێن ئەندازیاریا چاندنێ ل زانکۆیا دهۆک، ب هەلکەفتا ڕۆژا جیهانی یا خوارنێ، دووەمین ورکشۆپێ نشتیمانی یێ ساڵانە ل ژێر دروشمێ "Innovate Today. Nourish Tomorrow - ئەڤڕۆ داهێنانێ بکە بۆ دابینکرنا خوارنا سوبەهی" ب سەرکەفتییانە ئەنجام دا.

ئەڤ ڕێورەسمە ب ئامادەبوونا ڕاگرێ کۆلیژێد. شوکری حاجی ساڵح، سەرۆکێ پشکا زانست و تەکنەلۆژیایا خوارنێ د. خەبات نوری حسێن، ئەندامێن دەستەیا وانەبێژیێ، و نوونەرێن دەستەیا باڵا یا نەتەوەیێن ئێکگرتی بۆ پەنابەران (UNHCR)، ناڤەندا بازرگانیا نێڤدەولەتی (ITC)، ڕێڤەبەرییا گشتی یا ساخلەمیا دهۆکێ، دگەل چەندین ڕێکخراوێن نەحکومی و کۆمپانیێن پیشەسازیا خوارنێ برێڤەچوو.

پشتی پەیڤێن ب خێرهاتنێ، د. خەبات نوری بابەتەک ل ژێر ناڤێ «ڕۆلێ پشکا زانست و تەکنەلۆژیایا خوارنێ د ئاڤاکرنا سیستەمێن خوارنێ یێن بەردەوام دا» پێشکێشکر، و تێدا تیشک ئێخستە سەر گرنگیا ڤەکۆلین و داهێنانێن تەکنەلۆجی بۆ بهێزکرنا ئاسایشا خوارنێ.

پاشان چەندین تەوەرێن زانستی و گرنگ ژ لایێ بسپۆران ڤە هاتنە بەحسکرن:

• زنجیرەیا بهایێ خوارنێ: ژ لایێ برێز فەهد محەمەد (ITC) ڤە، ل سەر بهێزکرنا زنجیرەیێن بهایێ بەرهەمێن چاندنێ و گرێدانا وان ب بازاڕی ڤە.
• داهێنان د بەرهەمێ پەسەتاتکێ دا: ژ لایێ د. ڕافائیل تۆما ڤە، ل سەر دیتنا دوو جورێن نوی یێن پەسەتاتکا خۆجهی بۆ زێدەکرنا بهایێ خوارنێ و ئاسایشا خوارنێ.
• زیندەوەرێن هویر د خوارنێ دا: ژ لایێ د. عیسا موسا ڤە، ل دۆر مفاو مەترسیێن مایکرۆئۆرگانیزمان د سەلامەتی و بەرهەمئینانا خوارنێ دا.
• ڕێگری ل ساختەکارییا خوارنێ: ژ لایێ برێز شوکری سلێمان ڤە، دەربارەی ڕێکێن نوی یێن دۆزینەوە و بنبڕکرنا تەزویرێ د کارگەهێن خوارنێ دا بۆ پاراستنا ساخلەمیا وەلاتییان.
• سودوەرگرتن ژ بەرمایکێن خوارنێ: ژ لایێ د. سیامەند نزار ڤە، ل سەر گۆڕینا بەرمایکێن خوارنێ بۆ سەرچاوەیێن ب مفا د چارچۆڤێ ئابوورێ بازنەیی دا.

ئەڤ ورکشۆپە بوو دەرفەتەکا ب نرخ یا هەڤبەش بۆ لێکگوهۆڕینا زانست و سەربۆران د ناڤبەرا زانکۆیێ، ناڤەندێن نێڤدەولەتی، و کەرتی تایبەت دا. د ڤێ ڕێورەسمێ دا، پشکێ پێگرییا خۆ یا بەردەوام نیشاندا بۆ گرێدانا ڤەکۆلینێن زانستی ب پێدڤیاتیێن بازاڕی ڤە ژ پێخەمەت ئاڤاکرنا سیستەمەکێ خۆڕاگر و بەردەوام یێ خوارنێ ل دهۆکێ، هەرێما کوردستانێ، و ئیراقێ.

نڤیسینگەها خزمەتێن پێزانینان ل کۆلیژا زانستێن ئەندازیاریا چاندنێ (CAES)، 15 ێ چریا ئێکێ 2026

ئامادەکرن: سيپل محمد طاهر يوسف، بلند جلال حـ. همبی